Os amantes do patrimonio, da historia e da arquitectura teñen moitos e grandes motivos para visitar o xeodestino O Ribeiro-O Carballiño. Un dos motivos máis interesantes é descubrir os tres grandes mosteiros cistercienses: Oseira, San Clodio e Melón. Podemos dicir que todos os camiños da historia das comarcas do Ribeiro e O Carballiño pasan por este tres grandes mosteiros.
Separados por apenas 50 kms permítennos propor unha ruta que atravesa o Xeodestino de Norte a Sur para pasar unha xornada ou alongalo a unha fin de semana visitando con máis calma os monumentos e gozando do resto de experiencias como sendeirismo, enoturismo, termalismo e gastronomía
Mosteiro de Oseira
Visitar o Monasteiro de Oseira é unha experiencia única que nos traslada a outra época. Un mosteiro activo que acolle a unha comunidade de monxes cistercienses que recuperaron o edificio da ruína. Nada mellor que coñecer os seus segredos realizando unha visita guiada por un dos monxes visitando os seus claustros, a igrexa, a sala capitular de columnas retortas, o refectorio ou a botica. Tamén podemos sentir o ambiente de peregrinación pois conta cun albergue que acolle a peregrinos que realizan unha variante da Vía da Prata ou Camiño Mozárabe.
Como recordo material, tendo en conta que a pegada emocional será indeleble, podemos pasar pola tenda e levarnos unha mostra do famoso licor de eucalipto elaborado polos propios monxes.
Unha vez realizada a visita podemos celebrar unha boa comida nalgún dos restaurantes da contorna do mosteiro e dar un paseo pola área recreativa do río Oseira.
Paradas Obrigadas
Para completar a experiencia é necesario realizar dúas visitas obrigatorias. En primeiro lugar un forno de pan na localidade próxima de Cea para coñecer e degustar un dos mellores pans do mundo. Garantimos que está moi rico pero unha vez que descubras o laborioso proceso de elaboración e os seus fornos circulares de pedra o sabor alcanza unha nova dimensión.
A segunda parada realizámola no Carballiño onde se elabora un dos pratos estrela da gastronomía de Galicia: o polbo á feira. Se a visita é un día de feira atoparás a decenas de pulpeiras cos seus caldeiros fumarentos servindo polbo nos típicos pratos de madeira aderezados con aceite e pemento. No Carballiño atoparás unha animada actividade comercial e unha abundante oferta gastronómica para completar ao polbo.
Mosteiro de San Clodio
Desde O Carballiño tomamos a OU-504 ou eixo do Ribeiro e en apenas 10 quilómetros chegaremos ao Mosteiro de San Clodio. Convertido en hotel de 4 estrelas podemos entrar e visitar os seus dous espectaculares claustros, a igrexa e os xardíns. Un lugar onde o tempo parece deterse, un remanso de paz onde repasar a historia de arte desde o románico ao barroco pasando polo renacemento. Tamén atopamos o primeiro spa de Galicia que ofrece tratamentos con vinoterapia. Toda unha experiencia sensorial e de relax para descansar da contemplación de tanta arte e beleza.
Paradas Obrigadas
Na aldea de San Clodio temos varias opcións de aloxamento e de restauración, así como no próximo Leiro. Cabeceira municipal onde podemos pasear ás beiras do río Avia antes de partir en dirección á capital da comarca, Ribadavia.
En Ribadavia atoparemos unha das vilas medievais mellor conservadas de Galicia onde destaca o Castelo dos Sarmientos e o barrio xudeu. É outra parada obrigada que podemos aproveitar para degustar os viños do Ribeiro ou comer nalgún dos seus restaurantes. Desde aquí retomamos a ruta para acudir ao encontro co terceiro e último gran mosteiro da ruta.
Mosteiro de Melón
No mosteiro de Melón a visita realízase en dous planos.
Un é o de contemplación das ruínas e o percorrido polas estancias e espazos construídos e recoñecibles como a igrexa, os claustros, salas, escaleiras, corredores e o gran pombal.
O outro é pondo a voar a imaxinación para reconstruír o lugar recreando o esplendor do pasado recuperando historias medievais coñecidas a través da literatura, o cinema e a televisión. Un lugar menos coñecido que o converte aínda en máis máxico.
Paradas Obrigadas
Non se nos ocorre mellor plan que terminar a xornada en remollo nas augas do río Cerves que nos ofrece varias posibilidades igual de atractivas. Se a visita a realizamos no verán podemos darnos un mergullo nas próximas pozas de melón. Un lugar onde a forza da auga escavou varias piscinas naturais onde podemos desconectar contemplando fermosas cataratas e saltos de auga.
No inverno recomendamos achegarnos ata a localidade próxima de Prexigueiro e descubrir as termas de estilo xaponés.
Monasterio de Melón
Monasterio de San Clodio
Monasterio de Oseira